ട്രെയിനില്‍ ടിക്കറ്റ് ബുക്ക് ചെയ്യുമ്പോള്‍ കണ്‍ഫേം ടിക്കറ്റ് ലഭിക്കാത്തവര്‍ക്ക് യാത്ര ചെയ്യാന്‍ അവസരം നല്‍കുന്ന സംവിധാനമാണ് ആര്‍എസി (RAC). എന്നാല്‍ ഒരു ബെര്‍ത്തില്‍ മറ്റൊരു യാത്രക്കാരനുമായി സ്ഥലം പങ്കിടേണ്ടിവരുമ്പോഴും മുഴുവന്‍ ടിക്കറ്റിന്റെ പണം നല്‍കേണ്ടിവരുന്നത് ഏറെക്കാലമായി ചര്‍ച്ചയാകുന്ന വിഷയമാണ്. ഈ സാഹചര്യത്തില്‍ RAC സംവിധാനം അവസാനിപ്പിക്കുന്നതിനുള്ള സാധ്യതകള്‍ ഇന്ത്യന്‍ റെയില്‍വേ പരിശോധിക്കുന്നതായാണ് റിപ്പോര്‍ട്ടുകള്‍.
RAC എന്നതിന്റെ പൂര്‍ണരൂപം റിസര്‍വേഷന്‍ എഗെയ്ന്‍സ്റ്റ് കാന്‍സലേഷന്‍ (Reservation Against Cancellation) എന്നാണ്. ട്രെയിനിലെ എല്ലാ ബെര്‍ത്തുകളും കണ്‍ഫേം ആയിക്കഴിഞ്ഞാല്‍ ഒഴിവുള്ള ബെര്‍ത്ത് ലഭിക്കാത്ത ചില യാത്രക്കാര്‍ക്ക് ഈ സംവിധാനത്തിലൂടെ യാത്ര ചെയ്യാന്‍ അനുമതി ലഭിക്കും. സാധാരണയായി ഒരു സൈഡ് ലോവര്‍ ബെര്‍ത്തില്‍ രണ്ട് RAC യാത്രക്കാര്‍ക്കാണ് ഇരിപ്പിടം അനുവദിക്കുന്നത്. രാത്രിയില്‍ ഉറങ്ങുമ്പോള്‍ ഇരുവരും ഒരേ ബെര്‍ത്ത് പങ്കിടേണ്ടിവരാം. യാത്രയ്ക്ക് മുമ്പ് കണ്‍ഫേം ടിക്കറ്റ് റദ്ദാക്കപ്പെടുകയോ മറ്റൊരു ബെര്‍ത്ത് ഒഴിവാകുകയോ ചെയ്താല്‍, ലഭ്യതയും റെയില്‍വേ നിയമങ്ങളും അനുസരിച്ച് RAC യാത്രക്കാരന് മുഴുവന്‍ ബെര്‍ത്ത് ലഭിക്കാനും സാധ്യതയുണ്ട്.
RAC ടിക്കറ്റുള്ള യാത്രക്കാര്‍ക്ക് യാത്ര ചെയ്യാന്‍ അനുമതി ലഭിക്കുന്നുണ്ടെങ്കിലും ഒരു മുഴുവന്‍ ബെര്‍ത്ത് ലഭിക്കണമെന്നില്ല. എന്നിട്ടും സാധാരണ ടിക്കറ്റ് നിരക്ക് തന്നെ നല്‍കേണ്ടിവരുന്നു. പൂര്‍ണമായും ഒരു ബര്‍ത്തും, ഉറക്കസൗകര്യവും ലഭിക്കാത്ത യാത്രക്കാരില്‍നിന്ന് മുഴുവന്‍ നിരക്ക് ഈടാക്കുന്നത് എത്രത്തോളം ന്യായമാണെന്ന ചോദ്യമാണ് ഉയരുന്നത്.എന്നാലിപ്പോള്‍ RAC ആയി തുടരുന്ന യാത്രക്കാര്‍ക്ക് മുഴുവന്‍ ബെര്‍ത്ത് ലഭിക്കാത്ത സാഹചര്യത്തില്‍ നിരക്കില്‍ ഇളവ് നല്‍കുന്നതുള്‍പ്പെടെയുള്ള മാറ്റങ്ങള്‍ പരിഗണിക്കണമെന്ന ആവശ്യവും ഉയര്‍ന്നിട്ടുണ്ട്.
ദീര്‍ഘദൂര യാത്രകളില്‍ ഒരേ ബെര്‍ത്തില്‍ അപരിചിതരായ രണ്ട് യാത്രക്കാര്‍ക്ക് സ്ഥലം പങ്കിടേണ്ടിവരുന്നത് അസൗകര്യത്തിന് കാരണമാകാറുണ്ട്. പ്രത്യേകിച്ച് സ്ത്രീയും പുരുഷനും ഒരേ ബെര്‍ത്തില്‍ അനുവദിക്കപ്പെടുമ്പോള്‍ ചില സാഹചര്യങ്ങളില്‍ ഇരുവര്‍ക്കും അസ്വസ്ഥതയുണ്ടാകാം. ഇത്തരം സന്ദര്‍ഭങ്ങളില്‍ പകരം സംവിധാനം ഒരുക്കുന്നതും റെയില്‍വേ ജീവനക്കാര്‍ക്ക് വെല്ലുവിളിയാകാറുണ്ട്.
എന്തുകൊണ്ടാണ് RAC സംവിധാനം ആരംഭിച്ചത്?
ടിക്കറ്റ് റദ്ദാക്കുന്നതിലൂടെ ഒഴിവാകുന്ന ബെര്‍ത്തുകള്‍ കൂടുതല്‍ യാത്രക്കാര്‍ക്ക് പ്രയോജനപ്പെടുത്തുക എന്നതായിരുന്നു RAC സംവിധാനത്തിന്റെ പ്രധാന ലക്ഷ്യങ്ങളിലൊന്ന്. റെയില്‍വേയില്‍ കമ്പ്യൂട്ടര്‍ അധിഷ്ഠിത റിസര്‍വേഷന്‍ സംവിധാനം നിലവില്‍ വന്നതിനുശേഷവും RAC തുടര്‍ന്നു.
RAC സംവിധാനം അവസാനിപ്പിക്കുന്നതിനുള്ള സാധ്യതകള്‍ റെയില്‍വേ പരിശോധിക്കുന്നതായാണ് റിപ്പോര്‍ട്ടുകള്‍ സൂചിപ്പിക്കുന്നത്. എന്നാല്‍ സംവിധാനം പൂര്‍ണമായി നിര്‍ത്തലാക്കുന്നതിനുള്ള ഔദ്യോഗികമായ അന്തിമ തീരുമാനം പ്രഖ്യാപിച്ചിട്ടില്ല. പകരം എന്ത് സംവിധാനം കൊണ്ടുവരുമെന്ന കാര്യത്തിലും വ്യക്തതയില്ല. അതിനാല്‍ RAC ടിക്കറ്റുള്ളവര്‍ക്ക് നിലവിലുള്ള നിയമങ്ങള്‍ അനുസരിച്ചുതന്നെ യാത്രാ ക്രമീകരണങ്ങള്‍ നടത്താവുന്നതാണ്.
Content Highlights :Reports indicate that Indian Railways is exploring the possibility of discontinuing the RAC system